star whispers

عام مضى

اليوم اكملت مدونتي عامها الاول ,, وخطت خطوتها الاولى لتنتقل من نقطة الصفر " عنوان تدوينتي الاولى " الى الخطوة الاولى على سلم الحياة ..
عام مضى بحلوة ومره ,, شاركني فيه قراء مدونتي لحظات مختلفة من حياتي ,,

شاركنا دوروثي ميلز ف الرعب اللي كانت عايشة فيه ..
وعشنا لحظات خوف وترقب من انه الروح المعلقة تقدر ترجع للحياة في فيلم المعلق ..
عرفنا انه القرارات الجيدة تاتي من الخبرة والخبرة تاتي من الاخطاء وهذي هي الحياة فلا نقلق من اخطائنا لاننا نتعلم منها..
وعرفنا معنى الصداقة الحقيقية وان نحذر من العملات المزيفه..
تحمسنا مع جرس الموت وحاولنا نحل الالغاز معاهم " انا عن نفسي محاولاتي جميعها بائت بالفشل واللي شاف الفيلم فاهم قصدي"..
وحسينا بمعاناة جيك المسكين هو والخزانه المرعبة ..
خفنا على ديفيد وقت مااتخطف وانتهى بنا الامر اننا حزنا على العصابة اللي خطفته ..
وعرفنا الفرق بين مراحل السقوط المختلفة : سقوط العين ,, سقوط القلب ,, سقوط الذاكرة..
وتنقلنا مع المتنقل لجميع دول العالم ف لمح البصر وتمنينا نملك موهبته لكن غيرنا راينا بعد ماشفنا القناصين وعرفنا قصتهم..
عرفنا معا قصة كاس الجنون قرر بعضنا ان يشرب منه واصر البعض على عدم الشرب مهما تكلف الامر" بالنسبة لي انا ماحاشرب" ..
وقعدنا مع العصابة 13 ساعة ف المستودع واتاكدنا ان الجريمة لاتنفع صاحبها "كل ماافتكرهم احزن عليهم من اللي شافوه ف ليلتهم السودا "
واستفدنا كثير من النصايح اللي نقللنا اياها الشاعر ف موضوع " ماكذبت امي علي يوم قالت "

ركبتوا معايا قطار الحياة ف اول خاطرة انشرها من خواطري..
وبكيتوا معايا لما قررت الاستسلام لقلمي واخرجت مشاعري ف " اصعب شعور " ..
قدرنا مع بعض نمنع طيور الهم انها تعشش فوق رؤوسنا..
حاولنا نخلي دماغنا متفتح عشان نقدر نشوف الطفل ف الصورة ..
واتفرجنا مع بعض على فيلم " قريبا " وصرنا نكره كل الافلام اللي حتجي قريبا ..
عرفنا اش معنى الحب والامل والتصديق والثقة ف احلى صورها ..
وحسينا قد ايش ممكن يكون انقطاع الكهرباء الشعلة اللي تدفي القلوب البردانه من الوحده والاهمال ..
واتعلمنا نصائح مهمة جدا من كتيب ارشادات الحياة ..
سمحنا للشمس انها تشرق ف قلوبنا وقلوب من حولنا ..
و سعدنا باسلام اكبر داعي للنصرانية في كندا ..
اعجبنا بسرعة البديهة التي يمتلكها سائق اينشتاين ..
وتذكرنا قيمة اشياء كثيرة غفلنا عنها بسبب انشغالنا بالحياة ومتاعبها ..
وتعلمنا ان لانطيل الوقوف في محلات الفشل بل نستقل القطار المقبل لنصل به الى حديقة النجاح ..
عرفنا اش راس المال الحقيقي للانسان في " من يخلف الامبراطور"..
وتعرفتوا علا الشخصيات ال VIP ف حياتي ..
واكتشفنا من خلال اختبار بسيط لاي نوع من النساء ننتمي..
والكثير الكثير من المواضيع اللتي اتمنى ان تكونوا استفدتم منها ..

اللي متابع مدونتي فاهم انا اش كتبت والعكس صحيح الزوار الجدد او اللي يمروا كل فتره حيحسوا اني كاتبة طلاسم ..

حتقدروا تفكوا الطلاسم بقراءة المواضيع ..

اتمنى للجميع تصفح ممتع وان شالله تكون مواضيعي خفيفة على قلوبكم ومبهجه لارواحكم .. دمتم بود لي ولمدونتي وان شالله الجاي رح يكون احلى بمشيئة الله ..

مع حبي :همسات نجمة ..