star whispers

اصعب شعور

أصعب شعور ف الوجود لما تفقد إنسان كان كل شي ف حياتك وكنت انت كل شي ف حياته ..

فجأة مات ..

وراح من بين يديك بدون ماتقول له قد ايش انت تحبه وقد ايش هو ركن اساسي ف عالمك بدونه تحس نفسك ضايع ..
أول ما يتوفى يتوقع الناس انك حتنهار وماحتقدر تكمل حياتك بدونه !!

لكن ان ربك رؤؤف رحيم ..

ينزل الله على قلبك الثبات والسكينة اول ما تسمع الخبر لان الجميع منهار لازم يكون في احد يشد ازرهم ويحاول يصبرهم ..

قدرت تتماسك وتبين للي حوالينك انك قوي وصلب عشان تقدر تزبط الوضع الين مايفوقون من الصدمة ..

شعوران متناقضان :

شكلك هاديء وصامد من الخارج

بس من داخلك منهار ..

ودك تصرخ وتقول للميت احبك .. والله العظيم احبك ..

ليتني قلتها قبل كذا يمكن ارتحت..

تمر كم سنة على اللي صار

ويتوقع الناس اللي حواليك انك نسيت الموضوع

وخلاص انتهى ذا الشخص من حياتك ولا كأنه كان موجود..

مايدرون انك تحترق ف كل دقيقة ف داخلك ..

ف كل مناسبة حلوة تتمنى انه جنبك عشان يفرح معاك ..

ف نجاحك , ف الاعياد ,

ف كل لحظة فرح تستشعرها ف قلبك تتمنى انه جنبك ..

لما تحزن تتمنى انه جنبك يمسح دموعك ..

لما تمرض تتمنى انه جنبك يواسيك ..

لما تعصب وتثور تتمنى انه جنبك يهديك ..

لما احد يزعلك او يهينك تتمنى انه جنبك يدافع عنك ..

لما احد يمدحك تتمنى انه جنبك عشان يفخر بك..

لما يطير النوم من عينك تتمنى انه جنبك ..

لما تكون نايم تتمنى انه جنبك ..

لما تكون صاحي تتمنى انه جنبك ..

باختصار ف كل وقت ف حياتك مهما كان شعورك وقتها تبغاه يكون جنبك ويشاركك ذي اللحظة..

لان ببساطة محد يملى مكانه ف غيابه ..

اتوفت قبل سنتين ,,

كنت بالنسبة لها أغلى من عايلتها واخوانها واولادها بعض الاحيان ..

كانت تحبني أكثر من نفسها وأنا كمان حبيتها أكثر من نفسي

مع إني ما قد بينت لها هذا الشي بس فعلا هذا هو شعوري تجاهها

حتى لو ماقلته انا متاكدة انها كانت حاسة فيا ..

الله يرحمك يا جدتي ويسكنك فسيح جناته ويتغمدك برحمته ويجمعني بك ف الجنة ف هناك يجتمع الاحبة في الله اجتماعا ليس بعده فراق ولا حزن ولا دموع ...
نصيحة مني :

حبوا اهلكم الحين ,,

ابوك , امك ,

اخوانك , اخواتك ,

جدتك , جدك ,

عمتك , عمك ,

خالتك , خالك ....

وقولولهم انكم تحبونهم لو ف اليوم الف مرة

حتى لو قالوا انكم مجانين وماعندكم سالفة ..

وصلولهم مشاعركم قبل مايجي اليوم اللي تدورونهم فيه ماتلقونهم ..

ساعتها مايفيد الندم ..

سامحوني لو بكيتكم .. هذي المشاعر كانت حبيسة قلبي لسنتين .. وابت إلا ان تخرج فاطلقتها ..

* بقلمي *.